काठमाडौँ, माघ १४ गते ।

सङ्कटा क्लब राजधानीमा जारी सभापति कप फुटबल प्रतियोगिताको फाइनलमा प्रवेश गरेको छ ।

दशरथ रङ्गशालामा सोमबार भएको प्रतिस्पर्धात्मक सेमिफाइनल खेलमा मच्छिन्द्र क्लबलाई सडनडेथमा ८–७ गोलले हराउँदै सङ्कटाले फाइनलमा स्थान बनाएको हो ।

रोमाञ्चक खेलको निर्धारित ९० मिनेट गोलरहित बराबरीमा सकिएको थियो । त्यसपछि खेल टाइब्रेकरमा पनि ५–५ गोलको बराबरीहुँदै सडनडेथमा पुगेर सकिएको थियो । सडनडेथका सङ्कटा भाग्यमानी बन्यो ।

फाइनलमा सङ्कटाले एनआरटी र आयोजक टिम नेपाल लोकतान्त्रिक खेलकुद सङ्घ बागमतीबिचको विजेतासँग प्रतिस्पर्धा गर्नेछ । दोस्रो सेमिफाइनल खेल मङ्गलबार हुनेछ ।

नेपाली काँग्रेस निकट लोकतान्त्रिक खेलकुद सङ्घ महाधिवेशन निर्देशन समितिको आयोजना गरेको प्रतियोगितामा आठ टिमको सहभागिता रहेको थियो ।

प्रतियोगिताको विजेता टिमलाई २६ लाख र उपविजेतालाई १३ लाख रुपियाँ पुरस्कार प्रदान गरिनेछ । यो नेपाली नकआउट फुटबलको सर्वाधिक पुरस्कार राशी हो ।

यस्तै प्रत्यके खेलको प्लेयर अफ दि म्याचलाई १५ हजार, सर्वोत्कृष्ट खेलाडीलाई ७५ हजार, उत्कृष्ट गोलरक्षकलाई ५० हजार, सर्वाधिक गोलकर्तालाई ५० हजार र उदीयमान खेलाडीलाई २५ हजार रुपियाँ प्रदान गरिने आयोजकले जनाएको छ ।