काठमाडौँ ,माघ २५ गते ।

कागेश्वरी मनोहरा नगरपालिकाका प्रमुख उपेन्द्र कार्कीले स्वास्थ्य बीमालाई स्वस्थ नगरवासी निर्माणका लागि अपरिहार्य रहेको बताउनुभयो।

नेपाल ट्रेड युनियन कांग्रेस काठमाडौँ जिल्लाको आयोजनामा कागेश्वरी मनोहरा नगरपालिकाका भित्र काम गर्ने घरेलु कामदारहरूकोलागि” घरेलु कामदारका लागि विद्यमान राष्ट्रिय कानुन , अन्तर्राष्ट्रिय श्रम मापदण्ड, कार्यस्थलमा हुने हिंसा र उत्पीडन रोकथाम सम्बन्धी तालिम”को उद्घाटन कार्यक्रममा आफ्ना भनाइहरू राख्ने क्रममा सो कुरा बताउनुभएको हो।

उहाँले स्वास्थ्य बीमाले नगरवासीलाई अत्यावश्यक स्वास्थ्य सेवामा पहुँच सुनिश्चित गर्ने मात्र नभई आर्थिक अवस्था कमजोर भएका नागरिकलाई उपचारका लागि थप सुरक्षित र समर्थ बनाउन महत्त्वपूर्ण भूमिका खेल्ने बताउनुभयो ।

“स्वस्थ नगरवासीको निर्माण गर्न स्वास्थ्य बीमाको महत्व अत्यधिक छ। यसले नागरिकहरूको स्वास्थ्यको संरक्षण मात्र नगरी, उनीहरूको सामाजिक र आर्थिक सुरक्षा पनि सुनिश्चित गर्छ। हामी यसका लागि प्रयासरत छौं र नगरपालिकाको तर्फबाट स्वास्थ्य बीमामा कागेश्वरी मनोहरा नगरबासीलाई सहभागी गराउने काम भइरहेको छ,उहाँले बताउनुभयो।

उहाँले नगरपालिकामा आगामी दिनमा स्वास्थ्य बीमासम्बन्धी कार्यक्रम र योजनाहरू थप प्रभावकारी रूपमा लागू गर्ने प्रतिबद्धता जनाउनुभएको छ ।

यस बीच, नगरपालिकाले स्वास्थ्य बीमासम्बन्धी जागरूकता कार्यक्रमहरू पनि सञ्चालन गर्दै आएको छ।