ढल्केवर, वैशाख ३ गते : धनुषाको ढल्केबरमा रहेको नेपाल विद्युत् प्राधिकरणको सब स्टेसनस्थित ग्रिडमा बुधवार बिहान आगलागी हुँदा धनुषासहित तीन जिल्लाको विद्युत् आपूर्ति प्रभावित भएको छ।

नेपाल विद्युत् प्राधिकरण मदेश प्रदेशका प्रमुख शम्भुकुसियैत यादवले ढल्केबर ग्रिडको सिन्धुलीतर्फ जाने प्रसारण लाइनमा सिटी पड्किएर आगलागी भएको बताउनुभयो । उक्त आगलागीका कारण धनुषा, महोत्तरी र सर्लाही जिल्लाका केही क्षेत्रमा विद्युत् आपूर्ति अवरुद्ध भएको उहाँले जानकारी दिनुभयो ।

प्रमुख यादवका अनुसार ले १३२ केभी लाइन सबै स्थानमा सञ्चालनमा आइसकेको छ तर ३३ केभी लाइन अझै अवरोध छ। आगलागीका कारण पार्टपुर्जा जलेर क्षति पुगेको छ। नयाँ ट्रान्सफर्मर जडानको कार्य अघि बढिसकेको र जडान सकिने बित्तिकै लाइन पुनः सञ्चालनमा आउनेछ।

उहाँले दुई ट्रान्सफर्मर सञ्चालनमा आएपछि कुल विद्युत् आपूर्तिको झन्डै ७० प्रतिशत सेवा पुनः सुचारु हुने जानकारी दिनुभयो । ग्रिडको सिटीमा आगलागी भएका कारण विभिन्न उपकरणहरू जलेर नष्ट भएका छन्। केही दिनअघि मात्र सोही सब स्टेसनमा आगलागी भएको स्मरण गराउँदै उहाँले गर्मीको मौसममा अत्यधिक लोडका कारण यस्ता समस्या देखापर्न थालेको बताउनुभयो ।