२६ असार, काठमाडौं । नेपाल ट्रेड युनियन कांग्रेसले श्रमिकको न्यूनतम पारिश्रमिक बढाउन माग गर्दै सरकारलाई दबाब दिने भएको छ ।

नेपाल ट्रेड युनियन कांग्रेसले ७७ वटै जिल्ला र सातवटै प्रदेश समितिलाई परिपत्र गर्दै श्रमिकको न्यूनतम पारिश्रमिक रु १५ हजारबाट बढाएर २५ हजार पुर्‍याउन सबै ठाउँबाट दबाब दिन निर्देशन दिएको छ ।

नेपाल ट्रेड युनियन कांग्रेसका अध्यक्ष योगेन्द्र कुँवरले अहिलेको कहालीलाग्दो महँगीमा वर्तमान पारिश्रमिकले श्रमिकले दैनिक जीवनयापन गर्न कठिन रहेकोले पारिश्रमिक बढाउन सरकारलाई दबाब दिन लागेको बताए ।

नेपाल ट्रेड युनियन कांग्रेसले आगामी असार २७ गते ‘श्रमिकको न्यूनतम पारिश्रमिक रु २५ हजार निर्धारण गर’ व्यहोराको एसएमएस प्रधानमन्त्री, श्रममन्त्री र सचिवलाई गर्ने, असार २८ गते ७७ वटै जिल्लाका प्रमुख जिल्ला अधिकारीमार्फत श्रममन्त्रीलाई ज्ञापनपत्र बुझाउने भएको छ ।

यस्तै, असार २९ गते सातै प्रदेशमा प्रदेश सरकारलाई ज्ञापनपत्र बुझाउने, असार ३१ गते काठमाडौँमा राष्ट्रिय समितिले श्रममन्त्रीलाई ज्ञापनपत्र बुझाउने ट्रेड युनियन कांग्रेसका महासचिव अजय कुमार राईद्घारा हस्ताक्षरित परिपत्रमा उल्लेख छ ।