काठमाडौँ –२६ असार । मङ्गलबार बिहान सोलुखुम्बुबाट काठमाडौँका लागि उडेको मनाङ एयरको हेलिकप्टर सोलुखुम्बुको लिखुपिकेमा दुर्घटनामा पर्‍यो। दुर्घटनामा परेर उत्तर अमेरिकी मुलुक मेक्सिकोका पाँचजना यात्रु र पाइलट चेतबहादुर गुरूङको मृत्यु भयो ।

दुर्घटनामा परेका तीन जना महिला र दुई पुरूषहरू एकै परिवारको भएको खुलेको छ। नेपालका लागि मेक्सिकोका मानार्थ महावाणिज्यदूत नरेश दुगडका प्रतिनिधि चिरञ्जीवी भट्टराईका अनुसार दुर्घटनामा मृत्यु हुनेमा फर्नान्डो सिफुग्नेट्स, रिनकन इसमाइल, एबरिका गोन्जालेक्स, ओलासियो गोन्जालेज र मारिया होजे सिफुन्तेस छन्। उनीहरूमध्ये दुई जना आमा-बुवा र तीन जना छोराछोरी हुन्। अध्यागमन विभागका अनुसार उनीहरू १५ दिनको भिजिट भिसामा नेपाल आएका थिए ।

पासपोर्टमा उनीहरूको ठेगाना उत्तरी मेक्सिकोको कोआहुइला र निउभोलियोन उल्लेख छ। यी दुबै ठाउँ अमेरिकाको टेक्सास राज्यसँग जोडिएका छन्। रूस र अफगानिस्तानमा पनि हेलिकप्टर उडाएका अनुभवी पाइलट थिए चेतबहादुर ।

‘हिजो मौसमले साथ नदिएर आज मात्रै काठमाडौँ आउन लाग्नुभएको थियो। बाटैमा दुर्घटना भयो,’ भट्टराईले भने।

दुर्घटनाबारे दिल्लीस्थित मेक्सिकन राजदूतावासलाई रिपोर्टिङ्ग गरिरहेको र समन्वय गरेर शव पठाउने काम गर्ने भट्टराईले बताए ।