काठमाडौं ।

नेपाली कांग्रेसकी केन्द्रीय सदस्य समेत रहेकी परराष्ट्रमन्त्री डा.आरजु राणाले पार्टीका तर्फबाट प्रधानमन्त्री बन्ने कुरा एक या दुई पटक मात्र भनेर तोक्न नहुने बताएकी छिन् ।

शुक्रबार वीपीनगर, ललितपुरमा बसेको केन्द्रीय कार्यसमितिको बैठकमा नेतृ डा.राणाले भनिन्, ‘प्रधानमन्त्री कति पटक बन्न पाउने भन्ने विषयमा कुनै प्रावधान पार्टीको विधानमा नै राख्नुपर्छ भन्ने मलाई लाग्दैन, यो त अनुभव, काम तथा उसको प्रभाकारिताका आधारमा हुने हो ।’

प्रत्यक्ष निर्वाचनमा ३३ प्रतिशत महिला उम्मेदवारी अनिवार्य गर्नेगरी पार्टीले नीति बनाउनुपर्ने बताएकी छिन् ।

शुक्रबार वीपीनगर, ललितपुरमा बसेको केन्द्रीय कार्यसमितिको बैठकमा धारणा राख्दै डा.राणाले कांग्रेसले राज्यका निकायमा ३३ प्रतिशत महिला सभागिताको नीति लिए पनि प्रत्यक्ष निर्वाचनमै यसको सुनिश्चितताको माग गरेकी हुन् ।

उनले भनिन्, ‘समावेशिताबारे पहिल्यैदेखि भन्ने गरेको के हो भने प्रत्यक्ष निर्वाचनमै महिलालाई ३३ र दलित समुदायका लागि १० प्रतिशत उम्मेदवारीको सुनिश्चितता हुनेगरी नीति बनाऊँ, यो मेरो सुझाव हो ।’

नेतृ डा.राणाले पार्टीका प्रत्येक प्रशिक्षण कार्यक्रममा लैङ्गिक र समावेशितासम्बन्धी छुट्टै सत्र समावेश गरी यसको पाठ्यक्रममा नै लैङ्गिक र समावेशिता विषय समेट्नुपर्ने बताएकी छिन् ।

पार्टीका कुनै पनि विभागको अलग्गै वेबसाइट बनाएर त्यसमा ती विभागका कामहरूको प्रतिवेदन अद्यावधिक गरी राख्नुपर्ने उनले बताएकी छिन् । यसो गर्दा पार्टीका सबै विभागका क्रियाकलाप खुला रुपमा सबैले अध्ययन गर्न सक्ने हुनुपर्ने उनले बताएकी छिन् ।

कामको प्रभावकारिता र प्रतिबद्धताका आधारमा भातृ संस्था या शुभेच्छुक संस्थामा सदस्य तथा पदाधिकारी नियुक्त गरिनुपर्ने र उनीहरूको कामको आधारमा थप जिम्मेबारी दिनुपर्ने पनि उनले बताइन् ।

सम्पूर्ण भातृ संगठनहरूको बैंक खाता खोली ती अनुगमन पार्टीको केन्द्रले गर्ने र वर्षेनि लेखापरीक्षणको व्यवस्था हुनुपर्ने पनि डा.राणाले बताएकी छिन् ।