म्याग्दी, भदौ ८ गते ।

न्यु दोभान युवा क्लबको आयोजनामा आयोजित तेस्रो दोभान कप अन्तर माध्यमिक विद्यालय फुटबल प्रतियोगिता–२०८१ सुरु भएको छ ।

शनिबारदेखि बेनी बजारको खुलामञ्चमा आयोजित प्रतियोगिताको पहिलो खेलमा बेनी बजारको न्यु वेष्ट प्वाइन्ट आवासीय माध्यमिक विद्यालय र बेनी सामुदायिक माध्यमिक विद्यालयबिच उद्घाटन खेल भएको छ ।

प्रतियोगितामा देशभरबाट सहभागिता जनाउन पाइने भए पनि यस पटक ६ वटा विद्यालयले मात्र सहभागिता जनाएको क्लबका अध्यक्ष उपेन्द्र गिरीले जानकारी दिनुभयो । प्रतियोगिता तीन दिनसम्म सञ्चालन हुने उहाँले जानकारी गराउनुभयो ।

क्लबका अध्यक्ष अनन्त गिरीको स्मृतिमा आयोजित प्रतियोगितामा पहिलो हुनेले ४५ हजार रुपियाँ नगद, दोस्रो हुनेले २५ हजार रुपियाँ नगदसहित ट्रफि, मेडल र प्रमाणपत्र प्राप्त गर्नेछन् । साथै प्रतियोगितामा सर्वाधिक गोलकर्ता, उत्कृष्ट खेलाडी, उत्कृष्ट गोलरक्षक तथा अनुशासित टिमलाई नगद पुरस्कारको व्यवस्था गरिएको छ ।